काठमाडौं– प्रदेश नम्बर ३ प्रधानमन्त्री कप (पीएम कप क्रिकेट) एकदिवसीय क्रिकेट प्रतियोगितामा समूह ए को विजेता बन्दै सेमिफाइनलमा प्रवेश गरेको छ ।

प्रस्तावित मुलपानी अन्तर्राष्ट्रिय क्रिकेट मैदानमा भएको समूह चरणको अन्तिम खेलमा सुदुरपश्चिमलाई ६ विकेटले पराजित गर्दै सेमिफाइनलमा स्थान बनाएको हो । टस जितेर पहिलो ब्याटिङ गरेको सुदुरपश्चिम प्रदेशले दिएको १ सय ५५ रनको लक्ष्य प्रदेश नम्बर ३ ले ३३.२ ओभरमा ४ विकेट गुमाएर पुरा गर्‍यो ।

राष्ट्रिय क्रिकेट टोलीका कप्तान पारस खड्का र उप कप्तान ज्ञानेन्द्र मल्ल सम्मिलित प्रदेश नम्बर ३ का लागि ईशान पाण्डेले उत्कृष्ट ब्याटिङ गरे । उनले ५३ रन बनाउँदा अदिल खानले ३३ रन, कप्तान पारस खड्काले २६ रन बनाए । प्रदेश नम्बर ३ विरुद्ध सुदुरपश्चिमका महेस अधिकारी, शेर मल्ल, विकास आग्री र विनोद लामाले समान एक–एक विकेट लिए ।

यसअघि पहिलो ब्याटिङ गरेको सुदुरपश्चिमले ४५.१ ओभर खेल्दै सबै विकेट गुमाएर १५४ रन मात्रै बनाएको थियो । सुदुरपश्चिमका लागि खडक बोहराले ४० रन, रोसन अधिकारीले २७ र नरेश बोहराले २६ रन बनाएका थिए । सुदुरपश्चिमलाई १५४ रनमा रोक्न प्रदेश नम्बर ३ का सूर्य तामाङले ३ विकेट लिए ।

यस्तै, प्रतिश जिसी र जितेन्द्र ठकुरीले समान २–२ विकेट लिँदा नन्दन कुमार यादव र पारस खड्काले समान एक–एक विकेट लिए । प्रदेश ३ र एपीएफको समान ६–६ अंक भएपनि नेट रनरेटका आधारमा प्रदेश नम्बर ३ समूह विजेता बन्यो ।