काठमाडौं – अभिनेता विराज भट्टले निर्देशन गर्ने गरी चलचित्र ‘साङ्लो’ को औपचारिक घोषणा गरिएको छ । राजधानीमा शुक्रवार एक विशेष कार्यक्रमको आयोजना गर्दै फिल्म निर्माणको घोषणा गरियो ।

चलचित्रको शीर्ष भूमिकामा विराज भट्टले नै अभिनय गर्नेछन् भने फिल्ममा लगानीको केही हिस्सा भट्टकै रहनेछ । यस्तै विराजको अपोजिटमा मिस नेपाल २०१८ निकिता चन्डकले अभिनय गर्नेछिन् । फिल्ममा कामेश्वर चौरासिया, जयनन्द लामा लगायतका कलाकारको शीर्ष भूमिका रहनेछ । यस्तै फिल्ममा तेजकुमार खड्काको पनि निर्माण रहने बताइएको छ ।

अभिनेता विराज भट्टले आफूले बीचमा फिल्म बनाउने सोचे पनि लामो समयपछि नेपाली फिल्म क्षेत्रमा फर्कन लागेको बताए । पछिल्लो समय उनी भोजपुरी सिनेमामा पनि उत्तिकै सक्रिय छन् । उनको भोजपुरी सिनेमामा पनि उत्तिकै क्रेज छ ।

‘मैले कुनै समय भोजपुरी सिनेमा पनि निर्माण गर्नेछु, निर्माण नै गर्ने भए पहिले नेपाली सिनेमा किन नगर्ने भनेर ‘साङ्लो’ बनाउने निर्णय गरेँ, नेपाली फिल्म क्षेत्रसँग छुट्टै माया गाँसिएको छ,’ अभिनेता भट्टले भने ।

यस्तै फिल्ममा अनुबन्ध भएकी नायिका निकिता चन्डकले पनि फिल्मको कथावस्तु मन परेकाले गर्दा अभिनयका लागि राजी भएको बताइन् ।

चलचित्रमा स्किृप्ट शिवम् अधिकारीको हुनेछ । झण्डै २ करोडको लगानीमा निर्माण हुन लागेको यो फिल्म काठमाडौंबाहिर ‘भर्जिन’ लोकेसनमा छायांकन हुनेछ । झण्डै ५० दिन लगाएर छायांकन सकिने भट्टले बताए । उनले यो फिल्मका लागि झण्डै १ वर्षदेखि तयारी गरेको पनि बताए ।

चलचित्रमा कथा हालको समाज हेरेर त्यही अनुसार तयार पारेको निर्माण टिमले जनाएको छ ।