काठमाडौं– सरकारले समायोजनमा गएका कर्मचारीहरुको सबै गुनासो वैशाख भित्र सम्बोधन गर्ने तयारी गरेको छ ।

संघीय मामिला तथा सामान्य प्रशासन मन्त्री लालबाबु पण्डितले समायोजनमा गएका सबै कर्मचारीहरुको गुनासो सकेसम्म यही वैशाख महिना भित्र सम्बोधन गर्ने तयारी भइरहेको बताए ।

शुक्रबार काठमाडौंमा आयोजित एक साक्षात्कार कार्यक्रममा बोल्दै मन्त्री पण्डितले महिला र बिरामी परेका कर्मचारीहरुको गुनासो सुनुवाईको कामलाई पहिलो प्राथमिकतामा राखिने बताए ।

समायोजनका क्रममा श्रीमान् श्रीमतीलाई एकै ठाउँमा रहने गरि खटाउने व्यवस्था रहेको छ ।

सोही कानुनी व्यवस्था अनुसार कर्मचारीहरुको गुनासो सम्बोधनको काम भईरहेको मन्त्री पण्डितको भनाइ छ ।

मन्त्री पण्डितले समायोजनमा गएका प्रशासनतर्फका कर्मचारीहरुको गुनासो सम्बोधन गर्ने काम सकिएको र अहिले स्वास्थ्य क्षेत्रका कर्मचारीहरुको गुनासो सम्बोधनको काम भईरहेको पनि जानकारी दिए ।