काठमाडौं– भारतको पूर्वी तटीय क्षेत्रमा फानी नामक समुद्री आँधीले भारी वर्षा गराउन शुरु गरेको छ ।

फानी पूर्वी भारतको उडिसा राज्यको तटमा शुक्रबार बिहान स्थानीय समय अनुसार ८ बजेदेखि सक्रिय रहेको भारतीय सञ्चारमाध्यमले जनाएका छन् ।

आँधीले हाल उडिसा र पश्चिम बङ्गाल राज्यका तटीय क्षेत्रमा भारी वर्षा गराउन शुरु गरेको छ । २ सय किलोमिटर प्रतिघण्टाको गतिमा बङ्गालको खाडीबाट शुरु भएको आँधीले उडिसा राज्यको राजधानी भुवनेश्वरमा रहेका रुख, बिजुलीका पोल ढालिदिएको छ ।

त्यसबाहेक आँधी प्रभावित क्षेत्रमा विद्यालय तथा सरकारी कार्यालय बन्द भएका छन् भने रेल र हवाई उडान रद्द गरिएका छन् । यद्यपि आँधी आउनुअघि त्यस क्षेत्रका लाखौं मानिसहरुलाई सुरक्षित स्थानतर्फ सारिएकाले आँधीबाट कसैको मृत्यु भएको समाचार आएको छैन ।

आँधी जमिनमा आएपछि केही कमजोर हुने र विस्तारै उत्तरपश्चिम दिशातर्फ बंगलादेश जाने भारतीय मौषम पूर्वानुमान निकायको अनुमान छ ।