इजरायल– इजरायल अधिनस्थ प्यालेष्टाइनको वेष्ट ब्याङ्क क्षेत्रमा छुरा धस्न खोज्ने प्यालेष्टाइनीलाई त्यहाँ बसोबास गर्ने इजरायलीले गोली हान्दा प्यालेष्टाइनीको मृत्यु भएको छ । वेष्ट ब्याङ्कको नब्लुस क्षेत्रमा प्यालेष्टाइनीले इजरायलीलाई छुरा धस्न खोजेको र इजरायलीले जवाफमा गोली चलाउँदा उनको मृत्यु भएको हो ।

प्यालेष्टाइनीलाई गोली हान्ने इजरायलीले स्थानीय रेडियोलाई बताएअनुसार कारमा आफ्नी छोरीसँग कतै गइरहेका बेला एक प्यालेष्टाइनीले छुरो लिएर उनीहरुलाई आक्रमण गर्न आएका थिए । उनले त्यति नै बेला बन्दुक झिकेर आक्रमणकारीलाई लक्षित गरी गोली हानेको बताएका छन् । त्यस्तै अर्को कारमा रहेका अर्का इजरायलीले पनि आक्रमणकारीलाई लक्षित गरी गोली हानेका थिए ।

इजरायली सेनाले वेष्ट बङ्याकको नब्लुसमा ‘छुरा धस्न खोज्ने आतंककारी नागरिकको कारवाहीमा मारिएको’ जनाएको छ । इजरायलको बेइलिन्सन अस्पतालले गोली लागेर उपचारका लागि ल्याइएका एक जनाको मृत्यु भएको जनाएको छ ।

यता प्यालेष्टाइनी अधिकारीले भने इजरायली अतिक्रमणकारीले बाटो काट्न खोज्ने प्यालेष्टाइनीको हत्या गरेको जनाएको छ । प्यालेष्टाइनी अधिकारीले आक्रमणमा अर्का प्यालेष्टाइनी घाइते भएको जनाएको छ । इजरायली सेनाले भने त्यस घटनामा अर्का मानिस घाइते भएकोबारे कुनै टिप्पणी गरेको छैन ।

इजरायल र प्यालेष्टाइनबीच वेष्ट ब्याङ्क क्षेत्रमा सार्वभौमिकताको विषयलाई लिएर विवाद जारी छ ।