काठमाडौं – युवा अभिनेता प्रदीप खड्का र जसिता गुरुङको मुख्य भूमिका रहेको फिल्म ‘लभ स्टेशन’ चैत्र २२ मा रिलिज हुने भएको छ । यसअघि नयाँ वर्षको मौका पारेर चैत्र २९ गते रिलिज हुने भनिएको चलचित्र एक हप्ताअघि नै रिलिज हुने भएको हो ।

चैत्र २९ मा अनमोल केसी अभिनित फिल्म ‘ए मेरो हजुर ३’ पनि रिलिज हुँदैछ भने सोही मितिमा सलिनमान बानियाँ अभिनित ‘यात्रा’ पनि रिलिज हुँदैछ ।

उज्जल घिमिरेले निर्देशन गरेको ‘लभ स्टेशन’ को भियतनाम, भारत तथा नेपालका विभिन्न स्थानमा छायांकन गरिएको छ । सांगीतिक लभस्टोरी भनिएको यो चलचित्रमा प्रदीप र जसिता जोडीका रुपमा देखिनेछन् । यसअघि यी दुईले फिल्म ‘लिलिबिली’ मा एकसाथ काम गरेका थिए ।

फिल्म ‘लभ स्टेसन’ काफिया फिल्मसको ब्यानरमा निर्माण भएको हो भने फिल्मलाई काफिया शाही र कविरविक्रम शाहीले निर्माण गरेका हुन् ।

चलचित्रमा प्रदीप र जसिताका अलावा रमेश बुढाथोकी, रेशु भट्टराई, प्रकाश शाह, प्रिया रिजाल, कालु राना लगायतले अभिनय गरेका छन् ।

निर्माण टिमले भियतनाममा खिचिएको गीत भ्यालेनटाइन डे को अवसर पारेर सार्वजनिक गर्ने तयारी गरेको छ । फिल्ममा सम्भुजीत बाँस्कोटाको संगीत राजनराज शिवाकोटी, एलिस कार्की र दीपक शर्माको संगीत छ भने आलोक शुक्लाको छायांकन छ ।