नयाँ दिल्ली– भारतीय प्रहरीले मोस्ट वान्टेड सूचीमा रहेका आतंककारी दाउद इब्राहिमले पछिल्ला ३ वर्षमा कसैसँग पनि फोनमा कुराकानी नगरेको दाबी गरेको छ ।

दिल्ली प्रहरी (पुलिस)का एक अधिकारीको हवाला दिँदै भारतीय सञ्चारमाध्यमले लेखेका समाचारमा दाउदले सुरक्षाको कारण पछिल्ला तीन वर्षदेखि कसैसँग फोनमा कुराकानी नगरेका जनाइएको छ ।

दिल्ली प्रहरीले पछिल्लो पटक सन् २०१६ मा दाउदको एउटा टेलिफोन संवाद रेकर्ड गरेको थियो । सन् १९९३ मा भएको बम हमलापछि दाउद भारत छाडेर भागेका थिए ।

दिल्ली प्रहरीले जाँच एजेन्सीहरुको मद्दतबाट सन् २०१६ मा दाउदको टेलिफोन कुराकानी रेडर्क गरेको थियो । उक्त कुराकानी १५ मिनेटको भएको जनाइएको छ ।

भारतीय सुरक्षा एजेन्सीहरुले रेकर्ड गरेको टेलिफोन वार्तामा दाउद पाकिस्तानको कराँचीबाट युएईको दुबईस्थित आफ्ना सहयोगीसँग कुराकानी गरिरहेका सुनिएको थियो ।

त्यतिबेला सुरक्षा एजेन्सीले गरेको टेलिफोन रेकर्डका आधारमा दाउद मुटुको रागबाट ग्रसित रहेका समाचारहरु पनि सार्वजनिक भएका थिए । तर, पछि दाउदका भाई इब्राहिमले त्यस्ता समाचारहरुको खण्डन गरेका थिए ।

दिल्ली प्रहरीका अधिकारीको भनाइलाई भारतीय सञ्चारमाध्यममा उल्लेख गर्दै लेखिएको छ, ‘उ (दाउद) सादय फोनको प्रयोग गर्नबाट बचिरहेको छ । यसको अर्थ यो हैन कि उसले कराँचीमा रहेको आफ्नो अड्डा परिवर्तन गरिसकेको छ । हामीसँग अझै पनि दाउद पाकिस्तानमा रहेको पर्याप्त सूचना र प्रमाण छन् ।’

भारतको खुफिया एजेन्सी रिसर्च एण्ड एनालिसिस विङ (रअ)ले धेरै पटक दाउदको टेलिफोन वार्ता रेकर्ड गरेको भारतीय सञ्चारमाध्यमहरुले दाबी गरेका छन् ।

तत्कालीन दिल्ली प्रहरीका आयुक्त (कमिस्नर) नीरज कुमारले दाउदको टेलिफोन कुराकानी रेकर्ड गरेका थिए । दाउदको टेलिफोन कुराकानी रेकर्डबारे नीरज कुमारको भनाइ छ, ‘म्याच फिक्सिङ प्रकरणको अनुसन्धानका क्रममा हामीले दाउदको आवाज सुनेका थियौं । उक्त प्रकरणमा आईपीएलका धेरै क्रिकेटरलाई आरोपी बनाइएको थियो ।’