काठमाडौं–संघीय संसदको प्रतिनिधिसभा बैठक आज (शनिबार) बोलाइएको छ । दिउँसो २ बजे बस्ने बैठकमा विभिन्न ३ विधेयक प्रस्तुत हुने कार्यतालिका छ ।

संघीय संसदका महासचिव मनोहप्रसाद भट्टराईका अनुसार प्रतिनिधिसभाको आजको बैठकमा प्रतिनिधिसभाका सचिव गोपालनाथ योगीले प्रतिनिधि सभामा उत्पति भएका तीन विधेयक सम्बन्धी राष्ट्रियसभाबाट प्राप्त सन्देश टेकुल गर्ने कार्यतालिका छन् ।

योगीले निवृत्तिभरण कोष विधेयक २०७५, केही नेपाल ऐन संशोधन गर्ने विधेयक २०७५ र नेपालको संविधान अनुकुल बनाउन केही नेपाल ऐन संशोधन गर्ने विधेयक २०७५ टेबुल गर्ने भट्टराईले जानकारी दिए ।

यसअघि प्रतिनिधिसभाको शुक्रवारको वैठक शोक प्रस्ताव पारित गर्दै स्थगित भएको थियो । संस्कृति पर्यटन तथा नागरिक उड्डयनमन्त्री रवीन्द्रप्रसाद अधिकारीको निधनप्रति शोक प्रस्ताव पारित गर्दै शुक्रवारको बैठक स्थगित भएको हो ।

यसअघि बिहीबार बस्ने भनिएको वैठक मन्त्री अधिकारीसहित ७ जनाको निधन हुने गरी भएको हेलिकोप्टर दुर्घटनाका कारण शुक्रवार बस्ने गरी सूचना टाँस गरी स्थगित गरिएको थियो ।