काठमाडौं– नेपाली सेना पहिलो पटक विश्व सैन्य खेलकुद प्रतियोगितामा सहभागी हुने भएको छ ।

चीनको यूहान प्रान्तमा आगामी कार्तिक १ गतेदेखि शुरु हुने सातौं विश्व सैन्य खेलकुद प्रतियोगितामा नेपाली सेना पहिलो पटक सहभागी हुन लागेको हो ।

अन्तर्राष्ट्रिय सैनिक खेलकुद परिषदले खेलकुदको माध्यमबाट विश्वमा शान्ति स्थापना गर्ने मूख्य उद्देश्यका साथ प्रतियोगिताको आयोजना गरेको हो । प्रतियोगितामा २५ वटा खेल र दुई वटा प्रर्दशन खेल गरी २७ वटा खेलहरु हुनेछन् ।

जसमा एक सय पाँच राष्ट्रका १० हजार सात सय १९ जना खेलाडीहरु सहभागी हुनेछन् ।

नेपाली सेनाले आर्चरी, ब्याटमिन्टन, बक्सिङ, घोडचढी, जुडो, तेक्वान्दो, कुस्ती, बिच बलिवल, मोर्डन पेन्टाथलन, ट्रयाक एण्ड फिल्डलगायतका १३ वटा प्रतियोगितामा सहभागिता जनाउने छ ।