कास्की– अख्तियार दुरुपयोग अनुसन्धान आयोग पोखराको टोलीले खानेपानी योजनासँग ४ लाख रुपैयाँ घुस लिँदै गरेका एक इन्जिनियरलाई पक्राउ गरेको छ ।

खानेपानी तथा सरसफाइ डिभिजन कार्यालय स्याङ्जाका आठौँ तहका इन्जिनियर ओसी अख्तर महम्मदलाई चार लाख घुस लिँदै गर्दा अख्तियारको टोलीले रंगेहात पक्राउ गरेको अख्तियार पोखरा कार्यालयका प्रमुख काशीराज दाहालले जानकारी दिए ।

अख्तियारका अनुसार स्याङजाकै छत्रेदेउराली खानेपानी योजनाको भुक्तानी गर्ने क्रममा महम्मदले उपभोक्तासँग उक्त रकम माग्दै आएका थिए ।

पटक–पटक रकम मागेपछि केही उपभोक्ता अख्तियार आएर जानकारी गराएका थिए । खानेपानी योजनाका लागि चेकमार्फत भुक्तानी भइसकेको रकमबाट उनले घुस मागेका थिए ।