काठमाडौं– श्रीलंकाले मृत्युदण्डको सजायलाई पुनः ब्युँताएको विरोधमा काठमाडौंमा प्रदर्शन भएको छ ।

विभिन्न अधिकारवादी संस्थाहरुले महाराजगन्जस्थित श्रीलंकन दूतावास अगाडि पुगेर मृत्युदण्डको सजाय ब्युँताउन लागिएको भन्दै विरोध प्रदर्शन गरेका हुन् ।

एमनेस्टी इन्टरनेशनललगायत विभिन्न मानव अधिकारवादी संस्थाहरुले ‘नो डेथ पेनाल्टी’, ‘लाइफ नो डेथ’ लगायत लेखिएको प्लेकार्ड बोकेर श्रीलंकन दूतावास अगाडि प्रदर्शन गरेका हुन् ।

श्रीलंकन कानूनमा निश्चित अपराधका आधारमा मृत्यु दण्ड दिने प्रावधान छ । जसअनुसार अहिलेसम्म २ सय ९९ जना अभियुक्तलाई मृत्युदण्डको सजाय सुनाइएको छ ।

श्रीलंकन राष्ट्रपति मैत्रीपाला सिरिसेनाले गत बुधबार मृत्युदण्डको सजाय पुनः ब्युँताइएको घोषणा गरेका थिए ।

राष्ट्रपति सिरिसेनाको घोषणासँगै श्रीलंका सरकारले शुक्रबार मृत्युदण्ड दिइएका व्यक्तिलाई फांसीमा झुन्डाउने २ जना दल्लाद पनि नियुक्त गरेको छ ।