काठमाडौं– सत्तारुढ नेपाल कम्युनिष्ट पार्टी (नेकपा)का नेता योगेशकुमार भट्टराईले राष्ट्रिय आवश्यक्तालाई ध्यानमा राखेर सरकारले वितरणमुखि बजेट ल्याएको बताएका छन् ।

सरकारले ल्याएको बजेट वितरणमुखि भएको भन्दै प्रमुख प्रतिपक्ष दल नेपाली कांग्रेसले आलोचना गरिरहेका बेला नेता भट्टराईले गरीब जनताको हितलाई ध्यानमा राखेर सरकारले वितरणमुखि बजेट ल्याउनु परेको प्रतिक्रिया दिएका हुन् ।

आइतवार प्रतिनिधिसभामा सरकारले पेश गरेको ‘आर्थिक वर्ष २०७६÷७७ को राजस्व, र व्ययको आर्थिक अनुमान’माथिको प्रारम्भिक छलफलमा भाग लिँदै उनले गरीब, दलित, महिलालगायतका पिछडिएका समूदायको हितका लागि पनि बजेट वितरणमुखि हुनु मुलुकको बाध्यता भएको बताए ।

नेता भट्टराईले बजेटले राष्ट्रिय गौरवको आयोजनाहरुलाई पहिलो प्राथमिकतामा राखेर मुलुकको समृद्धिको अभियानलाई तीव्रता दिएको स्मरण गराए ।

माथिल्लो तामाकोसी जलविद्युत आयोजनाको काम सम्पन्न गर्ने गरी बजेट ल्याउनुले मुलुकको उर्जा संकट समाधानमा उल्लेख्य योगदान पुर्या‍उने उनको भनाइ छ ।