काठमाडौं- उपत्यकामा जामको समस्या तीव्र भएपछि आगामी असार १ गतेबाट बिहानदेखि बेलुकासम्म ठूला तथा साना मालबाहक सवारी प्रवेशमा रोक लगाइने भएको छ । बिहान ८ देखि बेलुकी ७ बजेसम्म रिंगरोडसहित काठमाडौं छिर्ने विभिन्न नाकाबाट मालवाहक सवारी सञ्चालनमा रोक लगाउने तयारी भइरहेको यातायात व्यवस्था विभाग स्रोतले जनाएको छ । सार्वजनिक विदाको दिन भने यो व्यवस्था लागू नहुने विभागले जनाएको छ ।

आपत्कालीन र अत्यावश्यक सेवामा प्रयोग भएका बाहेकका सवारीलाई तोकिएको क्षेत्रमा बिहानदेखि साँझसम्म प्रवेश र सञ्चालन नगर्न विभागले सूचित गरेको छ । दूध, तरकारी, फलफूल, पानी, कुखुराका चल्ला पानी, पेट्रोलियम पदार्थ, लगायतका सामग्री बोकेका सवारीलाई भने रोकिने छैन ।

काठमाडौं उपत्यकाभित्र मालबाहक सवारीको संख्या बाक्लिँदै गर्दा त्यसले रिंगरोड क्षेत्रमा पनि जाम बढेकाले नाकाहरुमै रोक्ने गरी निर्णय भएको विभाग स्रोतले जनाएको छ । काठमाडौं र ललितपुरको चक्रपथभित्रको सबै क्षेत्र र भक्तपुरको भित्री शहरी क्षेत्रमा पनि यो प्रावधान लागू हुनेछ ।

त्यसैगरी चक्रपथ बाहिरको चाबहिल–जोरपाटी सडक, गोपीकृष्ण–कपन सडक, नारायणगोपाल चोक–बुढानीलकण्ठ सडक, बालाजु बाइपास–गोलढुंगा सडक, बगडोल–नख्खु सडक, सातदोबाटो–हरिसिद्धी सडक, ग्वार्को–चापागाउँ सडकमा बिहान ८ बजेदेखि बेलुकी ७ बजेसम्म मालबाहक सवारी सञ्चालनमा निषेध गरिनेछ ।