एजेन्सी– तपाईंले प्रयोग गर्दै आउनु भएको सामाजिक सञ्जाल फेसबुक, इन्स्टाग्रामलगायत विश्वभर चर्चित यस्ता थुप्रै प्राविधिक कम्पनीहरुले आफ्ना प्रयोगकर्ताका लागि ल्याउन लागेको नयाँ–नयाँ सुविधाका विषयमा पहिले नै जानकारीहरु आउने गर्छन् । फेसबुकले जब आधिकारिक रुपमा डेटिङ्ग फिचर लन्च गर्‍यो, त्यो भन्दा अगाडि नै विश्वभरका मानिसहरुलाई यसबारे जानकारी भइसकेको थियो ।

यस्तै, इन्स्टाग्रामले प्रोफाइल फोटोको साथै आर्गुमेन्टेड रियालिटीको प्रयोग शुरु गर्यो‍, त्यसबारे जानकारी पनि पहिले नै विश्वभर फैलिएको थियो । तपाईंलाई लागेको हुन सक्छ, यस्ता जानकारी सम्बन्धित कम्पनीले नै सार्वजनिक गरेका हुन् भन्ने ।

तर, त्यसो नभइ त्यस्ता कम्पनीहरुले ल्याउन लागेको नयाँ फिचरबारेको जानकारी दिनेमा हङकङकी साइबर ह्याकर जेन वानचुन वोङ्गको नाम पहिलो नम्बरमा आउने गर्छ ।

इथिकल ह्याकिङकी ज्ञाता तथा टेक्नोलोजी ब्लगर एवं एप अनुसन्धानकर्ता जेनले विश्वका ठूला–ठूला प्राविधिक कम्पनीले ल्याउन लागेका नयाँ–नयाँ फिचरबारे सबैलाई पूर्व जानकारी दिने गरेकी छन् ।

सम्बन्धित कम्पनीले आफ्नो नयाँ सेवाबारे जानकारी दिनु पूर्व नै उनले करोडौँ रकम खर्चेर ति कम्पनीहरुले बनाएको साइबर सुरक्षालाई तोड्दै जानकारी सार्वजनिक गर्ने गरेकी छन् । इन्टरनेटको सुरक्षा कोड तोडेर उनले कम्पनीको नयाँ फिचरबारेको जानकारी सार्वजनिक गरे पनि उनले सम्बन्धित कम्पनीलाई नोक्सान हुने कुनै पनि किसिमको कार्य भने गर्दिनन् ।

उनको मुख्य ध्यान भनेको कुन कम्पनीले कुन किसिमको फिचर ल्याउँदै छ भन्नेमा मात्रै केन्द्रीत हुन्छ । २४ वर्षीय उनले आफुले प्राप्त गरेको जानकारी तत्काल ट्वीटर हेण्डलमार्फत सार्वजनिक गरिहाल्छिन् । प्राविधि क्षेत्रसँग जोडिएका जानकारी छिटोभन्दा छिटो थाहा पाउन चाहने प्रविधिविद तथा सञ्चारकर्मीले उनलाई फलो गरेका छन् । ट्वीटरमा उनलाई फलो गर्नेको संख्या २६ हजारभन्दा बढी पुगेको छ । कुनै पनि एपको फिचरबारे चासो राख्नु उनको आदत बनेको उनी बताउँछिन् ।

जेनमा ह्याकिङ्गप्रतिको चासो भने घरमा भएको कम्प्युटरबाट भएको थियो । उनका पिताले कम्प्युटरमा चाइल्ड लक लगाएर राख्ने गरेका थिए । तर उनले उक्त कम्प्युटरको सेक्युरिटी लक तोडिदिने गरेकी थिइन् । उनका पिताले जुन हिसाबमा लक राख्ने गरेका थिए, उक्त लक त्यसअनुसारको सुरक्षित नभएको भन्ने पाठ उनी सिकाउन चाहन्थिन् । योसँगै शुरु भएको उनको ह्याकिङ चासो बढ्दै गयो । र, उनी अहिले कोडिङ्ग तथा ह्याकिङकी महारथी बनेकी छन् ।