काठमाडौं – फिल्म ‘लभ स्टेशन’ टिमले आइतबार राति हुरी बतासका कारण बारा र पर्सामा भएको विपतपछि सहयोगको हात अगाडि बढाएको छ । निर्माण टिमले प्राकृतिक प्रकोपमा परेर धनजनको क्षति भएकोमा दुःख व्यक्त गर्दै अरुलाई पनि सहयोग गर्न अपील गरेको छ ।

फिल्मका अभिनेता प्रदीप खड्काले यो घटनाले आफूलाई अचम्मित र दुःखी दुवै बनाएको बताए । सोमबार काठमाडौंमा आयोजित पत्रकार सम्मेलनमा निर्माण टिमले सहयोग दिने घोषणा पनि गरे । निर्माण टिमले पीडितका लागि ५० हजार रुपैयाँ सहयोग दिने बताएको छ ।

फिल्मको कुरा गर्नुपर्दा यो फिल्म आउँदो शुक्रबारबाट रिलिज हुँदैछ । फिल्मको निर्देशन उज्ज्वल घिमिरेले गरेका हुन् । फिल्ममा प्रदीपको जोडी बनेर जसिता गुरुङ पर्दामा देखिनेछिन् ।