काठमाडौं– हेलिकोप्टर दुर्घटनामा परि निधन भएका संस्कृति पर्यटन तथा नागरिक उड्डयन मन्त्री रवीन्द्र अधिकारीलाई पत्नी विद्या भट्टराई अन्तिम श्रद्धाञ्जली अर्पण गरेकी छिन् । दिवंगत मन्त्री अधिकारीलाई श्रद्धाञ्जलि दिन शुक्रबार पोखरा प्रदर्शनी केन्द्रमा राखिएको थियो ।

अन्तिम श्रद्धान्जलीका लागि दिवंगत मन्त्री अधिकारीकी आमा, बुवासहित धर्मपत्नी विद्या भट्टराई पुगेका थिए । पतिको शवमा फूलमाला अर्पण गर्दा अधिकारी पत्नी विद्या भावविह्वल बनेकी थिइन् ।

बुधबार ताप्लेजुङमा भएको हेलिकोप्टर दुर्घटनामा मन्त्री अधिकारीसहित अन्य सात जनाको निधन भएको थियो ।

शुक्रवार(आज) विहान काठमाडौंको टुँडिखेलमा श्रद्धान्जली अर्पण गरिएपछि मन्त्री अधिकारीको पार्थिव शरीरलाई पोखरा लगिएको थियो ।

पोखराको प्रदर्शनी केन्द्रमा अन्तिम श्रद्धान्जलीका लागि मन्त्री अधिकारीको शव राखिएको छ ।

उपप्रधान एवं रक्षामन्त्री ईश्वर पोखरेलले दिवंगत मन्त्री अधिकारीलाई राष्ट्रिय झण्डा ओढाएका थिए भने नेकपाका नेता वामदेव गौतम र नारायणकाजी श्रेष्ठले पार्टीको झण्डा ओढाएर अन्तिम श्रद्धान्जली व्यक्त गरेका थिए ।

शवयात्रा पछि मन्त्री अधिकारीको आजै राजकीय सम्मानसहित अन्त्येष्टि गरिने छ ।