काठमाडौं– विभिन्न सरकारी कार्यालयका प्रमुखहरु विप्लव नेकपाको नाम लिएर डर त्रास देखाउँदै रकम असुल्ने तीन जनालाई प्रहरीले पक्राउ गरेको छ ।

घरमा बम पड्काउने र जिउ ज्यान लिनेसम्मको धाक–धम्की दिई रकम असुल्ने कार्यमा संलग्न ३ जनालाई प्रहरीले पक्राउ गरेको हो । पक्राउ पर्नेहरूमा काठमाडौं बानेश्वर बस्ने झापा गौरादह नगरपालिका–७ भएका ४२ वर्षीय विश्वराज शर्मा, भक्तपुर मध्यपुर नगरपालिका–३ गठ्ठाघर बस्ने झापा भद्रपुर नगरपालिका–८ ठेगाना भएका ४१ वर्षीय सुवाष कोइराला र काठमाडौं काडाँघारी बस्ने झापा भद्रपुर नगरपालिका–८ ठेगाना भएका २४ वर्षीय सुभम घिमिरे रहेका छन् ।

महानगरीय अपराध महाशाखाबाट खटिएको प्रहरी टोलीले शुक्रबार र आइतबार उपत्यकाका बिभिन्न स्थानहरुबाट उनीहरुलाई पक्राउ गरेको हो । उनीहरुलाई आवश्यक अनुसन्धान तथा कारबाहीको लागि महानगरीय प्रहरी परिसर काठमाडौं पठाइएको र थप अनुसन्धान कार्य जारी रहेको महाशाखाले जनाएको छ ।