बगदाद– इराकी सुरक्षा बलका सदस्यलाई लक्षित गरी गराइएको आक्रमणमा कम्तीमा ७ इराकी सुरक्षाकर्मीको ज्यान गएको छ ।

इराकमा गराइएका दुई बेग्लाबेग्लै आक्रमणमा ७ सुरक्षाकर्मीको ज्यान जानुका साथै अरु १६ सुरक्षाकर्मी घाइते भएका हुन् ।

राजधानी बगदादबाट ५० किलोमिटर उत्तरमा रहेको सलाहुद्दिन प्रान्तको दुजाइल जिल्लास्थित सइद गरिब क्षेत्रमा आतंकवादी संगठन इस्लामिक स्टेटका संदिग्ध लडाकुले गरेको आक्रमणमा इराकको अर्धसैनिक बल पपुलर मोबिलाइजेशन फोर्स पीएमएफका तीन सदस्य तथा इराकी प्रहरीका २ जनाको ज्यान गएको इराकी अधिकारीले जनाएका छन् ।

इरानसमर्थित पीएमएफ फौजलाई इराकमा सक्रिय शिया लडाकुको छाता संगठनका रुपमा लिइन्छ ।

त्यस्तै, उत्तरी इराकको स्वशासित क्षेत्र इराकी कुर्दिस्तानको सुलेमानिया प्रान्तमा रहेको कलार जिल्लामा गराइएको मोर्टार आक्रमणमा क्षेत्रीय सरकारप्रति वफादार अयाश सुरक्षा बलका दुई सदस्यको ज्यान गएको कुर्दिस्तनी अधिकारीले जनाएका छन् ।

आक्रमणमा आतंकवादी संगठन इस्लामिक स्टेटको हात रहेको बताइएपनि इस्लामिक स्टेटले आक्रमणको जिम्मा हालसम्म लिएको छैन ।

कुनै समय इराकको विशाल भूभागमा कब्जा जमाएको इस्लामिक स्टेटले आफ्नो सम्पूर्ण भूभाग गुमाइसकेपनि छापामार आक्रमणलाई भने निरन्तरता दिइरहेको छ ।