वाशिंटन डीसी– अमेरिकाले इरानका विदेशमन्त्री मोहम्मद जावाद जरिफमाथि प्रतिबन्ध लगाउने घोषणा गरेको छ ।

अमेरिकी अर्थमन्त्री स्टिभन मनुचिनद्वारा जारी वक्तव्यमा विदेशमन्त्री जरिफले इरानी सर्वोच्च नेताको जथाभावी पक्षपोषण गरेको तथा इरानी सत्ताको मुख्य प्रवक्ताका रुपमा विश्वभर इरानी धारणा फैल्याएको आरोप छ ।

वक्तव्यमा इरानी सत्ताको अहिलेका गतिविधि पूर्णतः अस्वीकार्य रहेकाले प्रतिबन्ध लगाउनु परेको जनाइएको छ ।

अमेरिकी प्रतिबन्धअनुसार विदेशमन्त्री जरिफको संयुक्तराज्य अमेरिकामा रहेको वा अमेरिकी संस्थाहरुको नियन्त्रणमा रहेको सम्पत्ति रोक्का गरिनुका साथै जरिफको अन्तर्राष्ट्रिय भ्रमणलाई सीमित गरिने छ ।

अमेरिकाले यसअघि इरानका सर्वोच्च नेता आयातोल्लाह अलि खमेनीविरुद्ध पनि प्रतिबन्धको घोषणा गरेको थियो ।

इरान र संयुक्तराज्य अमेरिकाबीचको सम्बन्धमा तनावको स्थिति रहेकै बेला अमेरिकाको नयाँ घोषणा सार्वजनिक भएको हो ।

अमेरिकी राष्ट्रपति ट्रम्पले विदेशमन्त्री जरिफले विदेशमन्त्रीको रुपमा नभई इरानी ‘प्रपोगान्डा’ मन्त्रीका रुपमा काम गरिरहेको आरोप लगाएका छन् ।

यसैबीच इरानी राष्ट्रपति हसन रौहानीले विदेशमन्त्री मोहम्मद जरिफमाथि प्रतिबन्ध लगाउने अमेरिकी निर्णय गलत र अस्वीकार्य रहेको टिप्पणी गरेका छन् ।