दाङ– दाङको राप्ती प्रादेशिक अस्पतालमा १ वर्षको अवधिमा २ सय ५८ जनाले सुरक्षित गर्भपतन गराएका छन् । अस्पतालमा गर्भपतन गराउनेमा २० वर्ष माथिका २ सय ३४ जना छन् भने १६ देखि २० वर्षका २४ जना महिला रहेका छन् ।

अस्पतालका मेडिकल रेकर्डर सुपरभाइजर दुर्गा रेग्मीका अनुसार अघिल्लो वर्षको भन्दा यसवर्ष गर्भपतन गराउने महिलाको संख्या बढेको छ । आर्थिक वर्ष २०७४/७५ मा २ सय २३ जनाले गर्भपतन गराएकोमा आर्थिक वर्ष २०७५/७६ मा २ सय ५८ जनाले गर्भपतन गराएका हुन् ।

अस्पतालमा सुरक्षित गर्भपतन गराउनेमा केही अविवाहित महिलाहरु पनि रहेका छन् । उनीहरुले गर्भपतनका लागि आउँदा आफ्नो वास्तविक नाम र ठेगाना नबताउने गरेको अस्पतालका चिकित्सक विनोद सिंहले बताए ।

केही महिलाहरु आफ्नो परिचय खुल्ने डरले असुरक्षित गर्भपतन गराइ स्वास्थ्यमा समस्या देखिएपछि मात्रै अस्पताल आउने गरेको डा सिंहले बताए ।  उनका अनुसार हरेक महिना ४ देखि ५ जना महिलाहरु अन्यत्र असुरक्षित गर्भपतन गराएर स्वास्थ्य समस्या देखिएपछि मात्रै अस्पतालमा आइपुग्ने गरेका छन् ।

पछिल्लो समय गर्भपतन गराउने महिलाहरु बढ्दै गएकाले गर्भपतन गराउनुभन्दा परि परिवार नियोजनका साधनको प्रयोग गर्नुपर्ने चिकित्सक बताउँछन् ।

अस्पतालले १२ हप्तासम्मको गर्भ महिलाको इच्छाअनुसार गर्भपतन गराउँदै आएको छ भने १२ देखि १८ हप्तासम्मको गर्भ बलात्कार, हाडनाता कसरी र गर्भका कारण आमाको ज्यान जोखिममा रहेको प्रमाणित भएमा गर्भपतन गर्ने गरेको छ ।

अस्पतालमा सुरक्षित गर्भपतनका लागि दाङ, सल्यान, रुकुम र रोल्पाबाट गर्भवतीहरु आउने गर्छन् । अस्पतालमा हुने गर्भपतन सेवा निशुल्क रहेको छ ।