खोटाङ- छुवाछूतमुक्त तथा जातीय विभेदविरुद्धको अभियानमा लागेका दिक्तेल रुपाकोट मझुवागढी नगरपालिका–१ का टङ्कप्रसाद आचार्यलाई ‘शहीद मनोज जोशी स्मृति पुरस्कार’ प्रदान गरिएको छ ।

जिल्लामा कायम रहेको छुवाछूत तथा जातीय विभेद अन्त्य गर्ने अभियानमा लाग्नुभएका ७६ वर्षीय आचार्यलाई शहीद मनोज जोशीको २८औँ स्मृति दिवसको अवसर पारेर बुधबार आयोजित कार्यक्रममा नगद पाँच हजार राशिको पुरस्कार प्रदान गरिएको हो ।

हिन्दु संस्कारमा हुर्किएका आचार्यले आफ्नो समाजमा कायम रहेको छुवाछूत तथा जातीय विभेद अन्त्य गर्न अभियान थालेकाले प्रोत्साहनस्वरुप पुरस्कृत गरिएको आयोजक शहीद मनोज जोशी स्मृति प्रतिष्ठानका अध्यक्ष कुमार आचार्यले जानकारी दिए । प्रदेशसभा सदस्य राजन राईले आचार्यलाई दोसल्ला ओढाएर प्रशंसापत्रसहित नगद पुरस्कार प्रदान गरे ।

समाजमा महिला र पुरुषबाहेक अन्य जात नरहेको भन्दै छुवाछूत तथा जातीय विभेद गर्नु दण्डनीय हुने आचार्यले बताउँदै आएका छन्।