काठमाडौं– सशस्त्र प्रहरी बलका ४ जना पूर्व महानिरीक्षक (आईजी) ले भ्रष्टाचार मुद्दामा सफाइ पाएका छन् ।

सशस्त्रका ४ जना पूर्व आइजीहरु कोषराज वन्त, शैलेन्द्र कुमार श्रेष्ठ, बासुदेव वली र सनत कुमार बस्नेतसहितले भ्रष्टाचार मुद्दामा सफाइ पाएका हुन् ।

विशेष अदालतका अध्यक्ष बाबुराम रेग्मी तथा सदस्य (न्यायाधीश)हरु द्वारिकामान जोशी र प्रमोदकुमार श्रेष्ठ बैद्यको सोमबारको इजलाशले भ्रष्टाचार मुद्दामा ४ जना पूर्व आइजीलाई सफाइ दिएको हो ।

सशस्त्र प्रहरी बलको मुख्यालय (हलचोक)का लागि सामान ढुवानीमा अनियमितता गरेको भन्दै अख्तियार दुरुपयोग अनुसन्धान आयोगले वन्तसहित ४ जना आइजीविरुद्ध विशेष अदालतमा मुद्दा दायर गरेको थियो ।

अख्तियारले गरेको छानबिनबाट सामान ढुवानी नै नगरी वन्तसमेतको संलग्नतामा अनियमितता भएको अभियोगमा मुद्दा दर्ता गरेको थियो ।

अख्तियारले वन्तकै बयानका आधारमा पूर्व आईजीहरु सनतकुमार बस्नेत, शैलेन्द्र कुमार श्रेष्ठ र बासुदेव ओलीविरुद्ध समेत मुद्दा दायर गरेको थियो ।

अख्तियारले पूर्व आइजी वन्तसँग १०, बस्नेतसँग ८ करोड, श्रेष्ठसँग १ करोड र बासुदेवी वलीसँग ७० लाख धरौटी माग गरेको थियो ।

अख्तियारले पूर्व आइजी वन्तसहित सशस्त्र प्रहरीका तत्कालीन लेखा प्रमुख (सशस्त्र प्रहरी निरीक्षक) बिन बहादुर थापा, भरत कुमार थापा, अरविन्द धिताल, जगत नारायण श्रेष्ठ, आनन्द थापामगर, मिलन अधिकारी र उज्जवल थपलियाविरुद्ध १८ माघ २०७२ मा विशेष अदालतमा मुद्दा दायर गरेको थियो ।

यस्तै पूर्व आइजी सनत कुमार बस्नेतविरुद्ध १७ फागुन २०७२ मा मुद्दा दर्ता गरिएको थियो । बस्नेतविरुद्धको मुद्दामा तत्कालीन लेखा प्रमुख (सशस्त्र प्रहरी निरीक्षक) बिन बहादुर थापासहित मनुहिरा महत, शिव बहादुर अधिकारी, देवेन्द्र कुमार श्रेष्ठ, निल बहादुर श्रेष्ठ र लेखबहादुर खत्रीलाई पनि प्रतिबादी बनाइएको थियो ।

यस्तै पूर्वी आईजी शैलेन्द्र कुमार श्रेष्ठविरुद्ध २४ माघ २०७२ मा दर्ता भएको मुद्दामा तकमान महरा, राम चन्द्र श्रेष्ठ र भरत कुमार थापालाई पनि अख्तियारले प्रतिवादी बनाएको थियो ।

पूर्व आइजी बासुदेव वलीविरुद्ध २९ माघ २०७२ मा दर्ता भएको मुद्दामा तत्कालीन लेखा प्रमुख (सशस्त्र प्रहरी निरीक्षक) बिन बहादुर थापा एवम् महेन्द्र बहादुर कार्कीलाई पनि प्रतिवादी बनाइएको थियो ।