निकोसिया- साइप्रसको राजधानी निकोसिया नजिकै क्षेप्यास्त्र खसेको छ ।

निकोसियाबाट २० किलोमिटर उत्तरपूर्वमा टर्किस साइप्रियोटतर्फ पर्ने तास्केन्ट क्षेत्रमा क्षेप्यास्त्र खसेको हो । क्षेप्यास्त्रले त्यस क्षेत्रको पहाडी इलाकामा आगलागी भएको जनाइएको छ । यसबाट कुनै मानवीय क्षति भने नभएको टर्किस साइप्रियोट अधिकारीले जनाएका छन् ।

क्षेप्यात्रस्त्र कसले प्रहार गरेको स्पष्ट भइसकेको छैन । यद्यपि सिरियामा इजरायली लडाकु विमानलाई लक्षित गरी प्रहार गरिएको हवाई प्रतिरोधी क्षेप्यास्त्र साइप्रससम्म पुगेको हुनसक्ने टर्किस साइप्रियोट अधिकारीले जनाएका छन् ।

क्षेप्यास्त्र प्रहार हुनु केही समयअघिमात्र इजरायलले सिरियामा हवाई आक्रमण गरेको थियो । त्यसबेला सिरियाली सेनाले इजरायली लडाकु विमानलाई लक्षित गरी रुसमा निर्मित एस २०० हवाई प्रतिरोधी क्षेप्यास्त्र प्रहार गरेका थिए । इजरायली जामर प्रविधीले उक्त क्षेप्यास्त्रलाई साइप्रसतर्फ लक्षित गरेको हुनसक्ने आँकलन छ ।

क्षेप्यास्त्रको अवशेष फेला परिसकेको र यस विषयमा आवश्यक अनुसन्धान अघि बढाइएको छ ।