काठमाडौं– काठमाडौंको अनामनगरस्थित एक कार्यालयबाट ६ लाख चोरी गरी भाग्दै गरेका धरानका कृतन राईलाई प्रहरीले पक्राउ गरेको छ ।

राइले आज दिउँसो अनमानगरस्थित सगरमाथा पोलुसन कन्ट्रोल कमिटीको शाखा कार्यालयको ढोका फुटाली सेफ भित्र राखिएको नगद रु ६ लाख चोरी गरेका थिए । सो कार्यालयमा चोरी गरी झ्यालबाट हाम फालेर भाग्दै गरेको अवस्थमा स्थानीयको सहयोगमा राईलाई प्रहरीले नियन्त्रणमा लिएको हो ।

महानगरीय वृत्त सिंहदरबारबाट खटिएको टोलीले राईलाई पक्राउ गरी आवश्यक अनुसन्धान जारी राखेको जनाएको छ ।  पक्राउ परेका राई यस भन्दा पहिला पनि पटक पटक चोरीको सामान सहित पक्राउ परेका थिए ।

यसअघि उनले चोरीको ल्यापटप सहित पक्राउ पर्दा चोरी मुद्धामा २ वर्ष कैद भुक्तान गरि छुटेका थिए । जेलबाट छुटेको एक महिना मै उनी पुनः चोरी कार्यमा संलग्न भइरहेको अवस्थामा पक्राउ परेका हुन् ।