काठमाडौं– युवा तथा खेलकुद मन्त्रालयको आयोजनामा तथा राष्ट्रिय खेलकुद् परिषद् (राखेप) को सहकार्यमा मदन भण्डारी स्पोर्ट्स एकेडेमीले सञ्चालन गर्ने यू—१६ नेसनल स्कूल क्रिकेट प्रतियोगिता मंगलबार (भोली) देखि शुरु हुने भएको छ ।

७ ओटा प्रदेशका ७ टिमले प्रतिस्पर्धा गर्ने प्रतियोगितामा स्कूलस्तरका क्रिकेटरहरु सहभागी हुने आयोजकले काठमाडौंमा पत्रकार सम्मेलन गरी जानकारी दिएको हो ।
चैत १९ देखि २५ गतेसम्म चल्ले प्रतियोगिताका सबै खेल कीर्तिपुरस्थित त्रिवि क्रिकेट मैदानमा हुनेछन् भने २३ गते हुने खेल मुलपानी क्रिकेट मैदानमा हुनेछ । प्रतियोगिता ३० ओभरमा खेलाइनेछ ।

सहभागी ७ टिमलाई २ समूहमा विभाजन गरिएको छ । प्रदेश नम्बर ३, गण्डकी, प्रदेश नम्बर ५ र कर्णाली समूह ‘ए’ मा छन् भने प्रदेश नम्बर १, प्रदेश नम्बर २ र सुदूरपश्चिम समूह ‘बी’ मा रहेका छन् । समूह चरणको खेलपछि दुवै समूहको शीर्ष २ स्थानमा रहने टोलीहरु सेमिफाइनलमा प्रवेश गर्नेछन् ।

यसै प्रतियोगितालाई आधार मानेर थाइल्याण्डमा आयोजना हुने एसीसी यू—१६ इस्ट्रन रिजनका लागि खेलाडी छनोटसमेत गरीने नेपाली राष्ट्रिय क्रिकेट टिमका प्रशिक्षक जगत टमाटाले बताएका छन् ।

कार्यक्रममा बोल्दै प्रशिक्षक टमटाले प्रतियोगिताबाट क्षमतावान युुवा खेलाडीहरुलाई राष्ट्रिय टोलीसम्म आउने बाटो खुल्ने पनि बताए ।

प्रतियोगिताको विजेताले १ लाख ५० हजार बराबरको खेल सामाग्री प्राप्त गर्नेछ भने उपविजेताले ७५ हजार बराबरको खेल सामग्री प्राप्त गर्नेछ ।