काठमाडौं– नेपाल बास्केटबल लिग बैशाख पहिलो हप्ताबाट शुरु हुने भएको छ । काठमाडौंमा सोमबार आयोजक प्ले फर डिप्राइभ्ड चिल्ड्रेन नेपाल (पीडीसीएन)ले पत्रकार सम्मेलन गरी प्रतियोगिता बैशाख ७ गतेदेखि शुरु हुने जानकारी गराएको हो ।

५५ दिनसम्म चल्ने उक्त प्रतियोगितामा ८ व्यवसायिक क्लबहरुको सहभागिता रहनेछ । जसमा गोल्डेनगेट इन्टरनेसनल कलेज, त्रिभुवन आर्मी क्लब, नेपाल पुलिस क्लब, दी टाइम्स इन्टरनेसनल कलेज, बुढानीलकण्ठ नगरपालिका बास्केटबल क्लब छन् ।

यस्तै, कीर्तिपुर बास्केटबल टिम, साउथ साइडर्स बास्केटबल क्लब र रोयल बास्केटबल क्लबले प्रतिस्पर्धा गर्दैछन् ।

प्रतियोगितामा सहभागी टोलीले होम एण्ड अवेका आधारमा एकआपसमा दुई—दुई खेल खेल्नेछन् । जसअनुसार सबैगरी प्रतियोगिताभर ६८ खेल खेलाइनेछ । दुई चरणको लिग पछि शीर्ष चार टोली प्लेअफमा स्थान बनाउनेछन् ।

यसअघि यो प्रतियोगिता क्विक्स बास्केटबल लिगको नाममा सञ्चालन भएको थियो । तर, यो वर्ष नाम परिवर्तन गरी नेपाल बास्केटबल लिग बनाइएको हो । नेपाली बास्केटबल खेलमा धेरै प्रतियोगिताहरु नहुने भएकाले यो लिगले नेपाली खेलाडीहरुलाई खेल्ने अवसर प्रदान गर्ने पीडीसीएनका अध्यक्ष अरुण कार्कीले बताए ।

प्रतियोगिताको साझेदार सानिमा जनरल इन्स्योरेन्सले सबै खेलाडी, प्रशिक्षक, रेफ्री र स्वयंसेवकसहित १ सय ६८ जनाको प्रतिव्यक्ति ५ लाखका दरले बिमा गर्ने भएको छ । हरेक टिमले ३ जना विदेशी खेलाडी टिममा आवद्ध गर्न पाउने र १ जनालाई मात्रै खेलाउन पाइने प्रावधान रहेको छ ।

प्रतियोगिताको पहिलो खेल बैशाख ७ गते गोल्डेनगेट इन्टरनेसनल कलेज र नेपाली सेनाको त्रिभुवन आर्मी क्लबबीच गोल्डेनगेटको घरेलु कोर्टमा हुनेछ । विजेता टोलीले पुरस्कार स्वरुप २ लाख नगद प्राप्त गर्ने र दोस्रो हुने टोलीले १ लाख नगद प्राप्त गर्नेछ ।