काठमाडौं– आइतवार साँझको हावाहुरीका कारण तराईंका बारा र पर्साका जिल्लामा घाइते भएकामध्ये ७ जनाको काठमाडौंमा उपचार भइरहेको छ ।

नेपाली सेनाको स्काइट्रक (जहाज)मार्फत काठमाडौं ल्याइएको ७ जनाको महाराजगञ्जस्थित त्रिवि शिक्षण अस्पतालमा उपचार भइरहेको छ ।

त्रिवि शिक्षण अस्पतालमा पुर्याइएका घाइतेमा पर्साकी समिना खातुन, बाराकी गितादेवी पटेल, महमद मिया, मुनाफ अन्सारी, कृष्ण पटेल, सुरेश पटेल र अमन पटेल छन् ।

घाइतेमध्ये गितादेवी पटेल र सुरेश पटेलको अवस्था गम्भीर रहेको जनाइएको छ । उनीहरुको शल्यक्रियाको तयारी भइरहेको त्रिवि शिक्षण अस्पतालका चिकित्सकले जानकारी दिएका छन् ।

शिक्षा, विज्ञान तथा प्रविधिमन्त्री गिरिराजमणि पोखरेलले त्रिवि शिक्षण अस्पताल पुगेर घाइतेको अवस्था बुझेका छन् ।

मन्त्री पोखरेलले हावाहुरीका कारण घाइते भएका सबैको उपचारको जिम्मा सरकारले लिने भन्दै उपचारमा कुनै कसर बाँकी नराख्न चिकित्सकहरुलाई निर्देशन दिए ।