एजेन्सी– शीर्ष स्थानको म्यानचेस्टर सिटीलाई उछिन्दै इङ्लीस प्रिमियरर लिगमा लिभरपुल शीर्ष स्थानमा उक्लिएको छ । आइतबार राति भएको खेलमा टोटनह्यामलाई पराजित गर्दै लिभरपुल शीर्ष स्थानमा उक्लिएको हो ।

टोटनह्यामको घरेलु मैदानमा भएको खेलमा पाहुना टोली लिभरपुलले घरेलु टोलीलाई २—१ गोल अन्तरले पराजित गरेको हो ।

लिभरपुलले खेलको १६ औं मिनेटमा गोल गर्दै अग्रता बनाएको थियो । लिभरपुलका लागि रोवोटो फिमिन्होले उत्कृष्ट गोल गर्दै टोलीलाई अग्रता दिलाएका थिए ।

त्यस्तै, लिभरपुलको अग्रता तोड्न टोटह्यामका लुकाज माउराले खेलको ७० औं मिनेटमा गोल गर्दै टिमलाई खेलमा फर्काएका थिए ।

१—१ अवस्थामा रहेको खेलमा टोटनह्यामका खेलाडी टोवे एल्डरवेइरेल्डले आत्मघाती गोल गरेपछि लिभरपुलले अंक बाड्नबाट जागिएको हो ।
जीतसँगै लिभरपुल दोस्रो स्थानको सिटी भन्दा २ अंकले अघि रहेको छ । लिभरपुलको ७९ अंक छ भने सिटीको ७७ अंक छ ।