काठमाडौं–मन्त्रिपरिषद बैठकले खानेपानी मन्त्री बिना मगरको विदेश भ्रमण अस्वीकृत गरेको छ । सोमबारदेखि शुक्रबारसम्म कोस्टारिकामा हुने भनिएको खानेपानीसम्बन्धी अन्तर्राष्ट्रिय कार्यक्रममा सहभागी हुन मन्त्री मगर जाने तयारी भए पनि मन्त्रिपरिषद बैठकले उनको भ्रमण रोकेको नागरिक दैनिकमा खबर छ ।

मगरसँगै मन्त्रालयका सहसचिव तेजलाल भट्ट, खानेपानी विभागका महानिर्देशक सुनिलकुमार दास तथा मन्त्रालयका उपसचिव टोलराज उपाध्याय पनि कोस्टारिका भ्रमणमा जाने कार्यक्रम तय गरिएको थियो ।

परीक्षा दिन नपाएपछि विद्यार्थी आन्दोलित शीर्षकको समाचारमा पोखरा विश्वविद्यालयले तोकेको मापदण्डविपरीत भर्ना भएका ३ सय ९१ विद्यार्थी व्यवस्थापनतर्फ स्नातक तहको पहिलो सेमेस्टरको परीक्षा दिन नपाएपछि आन्दोलनमा उत्रिएका छन् । व्यवस्थापनतर्फ स्नातक तहमा भर्ना हुन कक्षा ११ र १२ को परीक्षामा न्यूनतम सी ग्रेड ल्याएको हुनुपर्ने विश्वविद्यालयको प्रावधान छ । तर यो प्रावधान विपरीत ४२ वटा कलेजले सी भन्दा तलको ग्रेड ल्याएकालाई पनि भर्ना लिएका थिए ।

त्यस्तै हावाहुरीले बारा र पर्सामा पुर्‍याएको क्षति, ओखलढुंगामा जिप दुर्घटना हुँदा ६ जनाको मृत्युलगायतका समाचार प्राथमिकतामा छन्।