सुरुवात सबैको एउटै र गन्तव्य पनि एक
लानुछैन साथमा केही तरपनि लोभ अनेक ।।

जन्मियौं रितै नाङ्गै केवल प्राण साथमा बोकेर
सर्वश्रेष्ठ प्राणी मानवको नाम माथमा ।।

न पहिलो हुने ईर्ष्या थियो न त अन्तिम हुने त्रास नै
न कसैलाई दिनुपर्ला भन्ने लोभ थियो न पाउने आस नै ।।

पाठशालाले सिकायो अघि बढ्न अरुलाई जित्न सक्नुपर्छ
आफ्नो बलले माथि जान नसके अरुलाई थिच्न सक्नुपर्छ ।।

साथीभाई भन्छन् मलाई राम्रो गर अरुलाई घात गरे हुन्छ,
यो दुनियाँ साह्रै स्वार्थी छ तिमी मेरो चैं भर परे हुन्छ ।।

भागदौड छ सबैको मान दौलत र धनको लागि फुर्सद छैन
कसैलाई सोच्न आफ्नै जीवनकोलागि ।।

तछाडमछाड चल्छ जित्न बैरी बन्छन
आफ्नै मित्र जति जोडेपनि धन, शान्ति छैन मनभित्र ।।

आफ्नासँग दुरि बढ्छ, पैसा मात्र हुन्छ साथ
आफुमात्र सहि देख्छ जब सम्पत्तिको चढ्छ मात ।।

अन्धो हुने रैछ मान्छे धनको रासको
रापले कतिञ्जेल पो चल्छ जीवन वाहिरको तापले ।।

उमेर ढल्दै गएपछि दिन्न खुसि धनले
जब आफन्त र साथीभाइ सम्झन्छ यो मनले आयो रित्तै, जाने रित्तै ।

बित्यो जीवन भागीभागी जीवनभरी खिचातानी
यो दौड आखिर के का लागि ।।