काठमाडौं– प्रधानमन्त्री बालेन्द्र शाहले अर्थतन्त्र र पुँजीबजारका समस्याको विषयमा चासो लिएपछि त्यसको सकारात्मक प्रभाव सेयर बजारमा देखिएको छ।

 पछिल्ला दिनमा प्रधानमन्त्री शाहले नीतिगत तथा कार्यक्रमिक सुधारको पहल गर्ने उद्देश्यले उद्योगी, व्यवसायी, पुँजीबजार र नियामक क्षेत्रका प्रतिनिधिहरूसँग श्रृङ्खलाबद्ध रूपले भेटघाट गरिरहेका छन् । 

प्रधानमन्त्रीले आर्थिक क्षेत्रमा चासो लिएसँगै निरन्तर ओरालो लागेको नेपाल स्टक एक्सचेञ्ज (नेप्से) शुक्रबारबाट उकालो लागेको हो । साताको पहिलो दिन सोमबार नेप्से ४१.७० अंकले बढ्यो । 

नेप्सेमा ५ अर्ब ५१ करोड २६ लाख ८८ हजार रुपैयाँको कारोबार हुँदा नेप्से बढेर २७१९.२४ बिन्दुमा पुगेको हो । सोमबारको कारोबारमा २३९ वटा कम्पनीको सेयर मूल्य बढ्यो भने ३२ वटा कम्पनीको सेयर मूल्यमा गिरावट आयो ।

 तर, आज ५ वटा कम्पनीको सेयर मूल्य भने स्थिर रह्यो । नेप्से बढ्दा आज म्युचअल फन्ड बाहेक सबै उपसूचक हरिया बनेका छन् ।