काठमाडौं – फिफा विश्वकप २०२६ को उपाधि भिडन्तमा साविक विजेता अर्जेन्टिना र युरोपियन च्याम्पियन स्पेन आमनेसामने हुँदैछन् । न्यू जर्सीस्थित मेटलाइफ स्टेडियममा हुने यो खेललाई पछिल्ला वर्षकै सबैभन्दा प्रतीक्षित विश्वकप फाइनलका रूपमा हेरिएको छ ।

३९ वर्षीय कप्तान लियोनेल मेस्सी आफ्नो सम्भावित अन्तिम विश्वकप फाइनलमा चौथो विश्व उपाधि जित्ने लक्ष्यमा हुनेछन् । अर्कोतर्फ १९ वर्षीय लामिने यामाल नेतृत्वको स्पेन पहिलो पटक विश्वकप र युरो दुवैको लगातार विजेता बन्ने प्रयासमा हुनेछ ।

स्पेनले सेमिफाइनलमा फ्रान्सलाई २–० ले पराजित गर्दै फाइनल यात्रा तय गरेको थियो भने अर्जेन्टिनाले इंग्ल्यान्डलाई २–१ ले हराउँदै लगातार दोस्रो विश्वकप फाइनलमा स्थान बनाएको हो ।

स्पेनका प्रशिक्षकले सेमिफाइनलमा खेलेको टोलीलाई नै निरन्तरता दिने सम्भावना रहेको बताइएको छ । कप्तान रोड्री, निको विलियम्स, लामिने यामाल र मिकेल ओयार्जाबाल मुख्य जिम्मेवारीमा रहने अपेक्षा गरिएको छ । रक्षापंक्तिमा पाउ कुबार्सी र रोबिन ले नर्मान्डको जोडी रहने सम्भावना छ ।

यता अर्जेन्टिनाले पनि विजयी टोलीमा धेरै परिवर्तन नगर्ने संकेत दिएको छ। कप्तान मेस्सीसँगै जुलियन अल्भारेज, एन्जो फर्नान्डेज, रोड्रिगो डे पल र एलेक्सिस म्याक एलिस्टर मध्यपंक्तिको जिम्मेवारी सम्हाल्नेछन् । लाउटारो मार्टिनेज पूर्ण फिट अवस्थामा रहे पनि सुरुआती टोलीमा रहने वा बेन्चबाट खेल्ने विषयमा अन्तिम निर्णय खेलअघि गरिने बताइएको छ ।

दुवै टोलीमा ठूलो चोटको समस्या नरहेको र प्रशिक्षकहरूले आफ्नो बलियो टोली उतार्ने अपेक्षा गरिएको छ । स्पेनले प्रतियोगिताभर उत्कृष्ट रक्षात्मक प्रदर्शन गर्दै निकै कम गोल बेहोरेको छ भने अर्जेन्टिना मेस्सीको अनुभव र निर्णायक क्षणमा खेल जित्ने क्षमतामा भर पर्नेछ ।

फुटबल समर्थकको विशेष चासोको विषय मेस्सी र यामालबीचको पुस्तान्तरणको प्रतीकात्मक भिडन्त पनि हो । एकातिर विश्व फुटबलका महान खेलाडी मेस्सी छन् भने अर्कोतर्फ उनको उत्तराधिकारीका रूपमा हेरिएका यामाल पहिलो विश्वकप उपाधिको खोजीमा छन् ।

यसपटकको विश्वकप फाइनलमा पहिलो पटक सुपर बाउल शैलीको हाफटाइम शो पनि समावेश गरिनेछ, जसले खेललाई थप आकर्षक बनाउने अपेक्षा गरिएको छ ।