काठमाडौं– इङ्ग्ल्यान्डविरुद्धको विश्वकप सेमिफाइनलमा अर्जेन्टिनाका कप्तान लियोनेल मेस्सी र इङ्ग्लिस स्टार जुड बेलिङ्घमबीच भएको भनाभनको विषय सार्वजनिक भएको छ। 

खेलको सुरुआती चरणमै दुवै खेलाडीबीच फाउलको विषयलाई लिएर चर्काचर्की भएको थियो। 

प्रत्यक्ष प्रसारणमा आवाज स्पष्ट नसुनिए पनि मैदान नजिकका माइक्रोफोन र ओठको हाउभाउ (लिप रिडिङ) का आधारमा उनीहरूबीचको संवाद बाहिर आएको अन्तर्राष्ट्रिय सञ्चारमाध्यमहरूले जनाएका छन्। 

रिपोर्टअनुसार बेलिङ्घमले मेस्सीतर्फ हेर्दै, ‘अब तिम्रो समय सकियो, अब हाम्रो पालो हो’ भन्ने आशयको टिप्पणी गरेका थिए। त्यसको जवाफमा मेस्सीले शान्त रहँदै ‘खेल सकिएपछि कुरा गरौँ’ भन्ने प्रतिक्रिया दिएका थिए। 

यो घटनापछि अर्जेन्टिनाले खेलमा उत्कृष्ट पुनरागमन गर्दै २–१ को जित निकाल्यो। इङ्ग्ल्यान्डले एन्थोनी गोर्डनमार्फत अग्रता लिए पनि एन्जो फर्नान्डेजले बराबरी गोल फर्काए। 

त्यसपछि अतिरिक्त समयको दोस्रो मिनेटमा लाउटारो मार्टिनेजले निर्णायक गोल गर्दै अर्जेन्टिनालाई लगातार दोस्रो विश्वकप फाइनलमा पुर्‍याए। मेस्सीले बराबरी गोलका लागि महत्त्वपूर्ण असिस्ट गरेका थिए। 

खेलपछि सामाजिक सञ्जालमा मेस्सी र बेलिङ्घमबीचको भनाभनको भिडियो व्यापक रूपमा भाइरल बनेको छ। धेरै समर्थकले बेलिङ्घमको चुनौतीको अन्तिम जवाफ मेस्सीले आफ्नो प्रदर्शनबाट दिएको टिप्पणी गरेका छन्।