काठमाडौं– फिफाले २०२६ फिफा विश्वकपको फाइनल खेलका लागि स्लोभेनियाका अनुभवी रेफ्री स्लाभ्को भिन्चिचलाई नियुक्त गरेको छ। 

उपाधिका लागि स्पेन र अर्जेन्टिनाबीच सोमबार अमेरिकाको न्यु जर्सीस्थित मेटलाइफ स्टेडियममा हुने खेलमा उनले मुख्य रेफ्रीको भूमिका निर्वाह गर्नेछन्। 

४६ वर्षीय भिन्चिचलाई सहायक रेफ्रीका रूपमा उनका हमवतन टोमाज क्लान्चनिक र आन्द्राज कोभाचिचले साथ दिनेछन्। जोर्डनका अधाम मखादमेह चौथो अधिकारीका रूपमा रहनेछन्। 

भिन्चिच युरोपका सबैभन्दा अनुभवी रेफ्रीमध्ये एक मानिन्छन्। उनले २०२४ को यूईएफए च्याम्पियन्स लिग फाइनल (रियल म्याड्रिड विरुद्ध बोरुसिया डर्टमुन्ड) र २०२२ को यूईएफए युरोपा लिग फाइनलसमेत सञ्चालन गरिसकेका छन्। 

विश्वकपमा पनि उनी दुवै टोलीका लागि परिचित अनुहार हुन्। कतारमा भएको २०२२ विश्वकपमा उनले अर्जेन्टिनाको साउदी अरेबियाविरुद्धको समूह चरणको खेल सञ्चालन गरेका थिए, जहाँ अर्जेन्टिना २–१ ले पराजित भएको थियो। 

त्यस्तै, उनले युरो २०२४ मा स्पेनको इटालीमाथिको १–० को जितमा पनि रेफ्रीको जिम्मेवारी सम्हालेका थिए। 

यसपटकको फाइनलमा स्पेन दोस्रो विश्वकप उपाधिको खोजीमा हुनेछ भने अर्जेन्टिना कतार २०२२ को उपाधि जोगाउँदै इतिहासमै चौथो विश्वकप जित्ने लक्ष्यसहित मैदान उत्रिनेछ।