एटलान्टा- फिफा विश्वकपको सेमिफाइनलमा अर्जेन्टिनासँग २–१ को हार बेहोरेपछि इंग्ल्यान्डका स्टार मिडफिल्डर जुड बेलिङ्घम विवादमा तानिएका छन्।

खेल सकिएलगत्तै उनी अर्जेन्टिनाका बेञ्चमा रहेका डिफेन्डर भ्यालेन्टिन बार्कोसँग झडपमा उत्रिएको भिडियो सामाजिक सञ्जालमा भाइरल भएको छ।

भिडियोमा बेलिङ्घम अर्जेन्टिनाका खेलाडीहरू उत्सव मनाइरहेका बेला बार्कोतर्फ गएर उनको टाउकोको पछाडि प्रहार गरेको देखिन्छ।

त्यसपछि बार्कोले प्रतिक्रिया जनाउँदा दुवै टोलीका खेलाडीबीच केहीबेर तनाव सिर्जना भएको थियो। अन्य खेलाडीहरूले हस्तक्षेप गरेपछि स्थिति सामान्य बनेको थियो।

घटनाको कारणबारे आधिकारिक जानकारी सार्वजनिक भएको छैन। केही सञ्चारमाध्यमका अनुसार अर्जेन्टिनाको उत्सवका क्रममा भएको भनाभनपछि बेलिङ्घमले आवेगमा नियन्त्रण गुमाएका हुन सक्ने अनुमान गरिएको छ।

सेमिफाइनलमा इंग्ल्यान्डले एन्थोनी गोर्डनको गोलमार्फत अग्रता लिएको थियो ।

तर पनि अर्जेन्टिनाले अन्तिम समयमा पुनरागमन गर्दै एन्जो फर्नान्डेज र लाउटारो मार्टिनेजको गोलमा २–१ को जित निकालेर फाइनलमा स्थान बनाएको थियो। कप्तान लियोनल मेस्सीले दुवै गोलका लागि निर्णायक पास दिएका थिए।