काठमाडौं– सर्वोच्च अदालतले बन्दीप्रत्यक्षीकरण रिटमा आदेश जारी गर्दै महोत्तरी कारागारमा रहेका लक्ष्मी महतो कोइरीलाई अन्य कुनै मुद्दामा थुनामा राख्नुपर्ने अवस्था नरहेको भए तत्काल थुनामुक्त गर्न निर्देशन दिएको छ।

सर्वोच्च अदालतको मुद्दा तथा रिट महाशाखा (रिट–६) ले २०८३ असार ३२ गते कारागार कार्यालय, महोत्तरी (जलेश्वर) लाई पत्राचार गर्दै अदालतको आदेश कार्यान्वयन गर्न भनेको हो।

कोइरीका छोरा मनोज कुमार महतोले आफ्नो बाबुको हकमा बन्दीप्रत्यक्षीकरणको रिट दायर गरेका थिए। उक्त रिटमा इलाका प्रहरी कार्यालय, गौशाला (महोत्तरी) लगायतलाई विपक्षी बनाइएको थियो।

सर्वोच्च अदालतले दिएको आदेशमा अन्य कुनै मुद्दामा थुनामा राख्नुपर्ने अवस्था नभए लक्ष्मी महतो कोइरीलाई सोही दिन थुनामुक्त गर्न भनिएको छ। आदेशको प्रमाणित प्रतिलिपिसमेत सम्बन्धित निकायमा पठाइएको अदालतले जनाएको छ।

यस आदेशको बोधार्थ इलाका प्रहरी कार्यालय गौशाला, जिल्ला प्रहरी कार्यालय महोत्तरी (जलेश्वर), महोत्तरी जिल्ला अदालत तथा उच्च अदालत जनकपुरलाई समेत पठाइएको छ।