काठमाडौं- चर्चित भारतीय क्रिकेटर सचिन तेन्दुलकरले काठमाडौंको कीर्तिपुर मैदानमा क्रिकेट खेल्ने भएका छन् ।

उनले बालबालिका सम्बन्धी महासन्धी पारित भएको ३० औं वर्षगाँठको अवसरमा हुन लागेको मैत्रीपूर्ण क्रिकेट खेल्ने भएका हुन् । सो मैत्रीपूर्ण खेलका लागि सचिन शुक्रबार राति नेपाल आएका छन् ।

उनी युनिसेफको सद्भावना दूतको हैसियतमा नेपाल आएका हुन्। नेपाल भ्रमणका क्रममा उनले शनिबार बिहान कीर्तिपुरस्थित टियु मैदानमा क्रिकेट खेल्दैछन्। खेल १० ओभरको हुनेछ ।

बालअधिकारका लागि आयोजना गरिएको मैत्रीपूर्ण खेलमा सचिनको टिमसँग नेपाली क्रिकेट टिमका पूर्व कप्तान विनोद दासको टिमले खेल्नेछ ।

युनिसेफको आयोजनामा हुने उक्त खेल शनिबार विहान ९ बजे शुरु हुने युनिसेफले जानकारी दिएको छ ।