काठमाडौं– प्रधानमन्त्री वालेन्द्र शाहको कार्यशैलीलाई लिएर तीव्र आलोचना भइरहेका बेला प्रमुख प्रशासनिक केन्द्र सिंहदरबारभित्रै आन्दोलन सुरू भएको छ।

करारका कर्मचारी हटाउने तयारीको विरोधमा अर्थ मन्त्रालयको गेटमा नाराजुलुस भएको हो । १८ वटै मन्त्रालयका करार कर्मचारीहरूले सरकारविरुद्ध धर्नासहित नाराजुलुस गरेका हुन् ।

सरकारले करार सेवामा कार्यरत कर्मचारीलाई हटाई आउटसोर्सिङमार्फत् कर्मचारी भर्ना गर्ने तयारी गरेको भन्दै १८ वटै मन्त्रालयका करार कर्मचारीहरूले मंगलबार सिंहदरबारस्थित अर्थ मन्त्रालयको मुख्य प्रवेशद्वार अगाडि धर्ना दिएका हुन्।

सरकारको उक्त तयारीले लामो समयदेखि करार सेवामा कार्यरत हजारौँ कर्मचारीको रोजगारी असुरक्षित हुने भन्दै उनीहरूले निर्णय फिर्ता लिन माग गरेका छन्।

आन्दोलनरत कर्मचारीहरूले आफूहरूको सेवाको सुनिश्चितता गर्न र आउटसोर्सिङ प्रणाली लागू गर्ने निर्णय रोक्न सरकारसँग आग्रह गरेका छन्।

तस्बिरहरू: नेपाल फोटो लाइब्रेरी