काठमाडौं- विपक्षी दलका सांसदहरूले राज्य संरक्षित व्यक्तिहरूले सञ्चारमाध्यम लगायतका स्थानमा सवारी साधान राखेर त्रास सिर्जना गर्न खोजेको भन्दै कारबाहीको माग गरेका छन् ।

मंगलबार प्रतिनिधिसभा बैठकमा उनीहरूले सवारी साधान राखेर त्रास सिर्जना गर्न खोज्नेलाई सामान्य ट्राफिक जरिवाना मात्रै गरिएकोमा आपत्ति जनाएका छन् ।

बैठकमा कांग्रेस सचेतक निश्कल राईले सरकारमाथि प्रश्न गर्नेमाथि राज्य सयन्त्रले दमन गर्न खोजेको आरोप लगाए।

उनले होल्डिङ सेन्टर, गणेश नेपालीको आत्मदाह घटना र गाडी तेर्स्याइएको प्रकरणमा राज्यको संलग्नता रहेको उल्लेख गरे ।

सरकारले हरेक प्रकरणलाई राजनीतिकरण गर्न खोजेको पनि उनले बताएका छन् ।

त्यस्तै नेकपा सांसद रमेश मल्लले सञ्चारमाध्यम अगाडि सवारी साधन राखेर त्रास फैलाउनेलाई कडा कारवाही गर्न माग गरे ।

उनले राज्य संरक्षित केही व्यक्तिबाट उक्त गतिविधि भएको आरोप लगाउदै सामान्य जरिवाना तिराएर जिम्मेवारीबाट उन्मुक्ति दिने काम स्वीकार्य नहुने स्पष्ट पारे।

विपक्षी दलका सांसदहरूले सवारी साधान पार्किङ घटनामा राज्यको संलग्नता भएको आरोप लगाएपछि रास्वपाका केही सांसदहरूले नियमापति गरेका थिए ।