काठमाडौं- चीनका एक प्रभावशाली अर्थशास्त्री गाओ शानवेनको निधन भएको छ । चिनियाँ सञ्चारमाध्यमहरूका अनुसार ५४ वा ५५ वर्षको उमेरमा उनको निधन भएको हो । राज्यसञ्चालित ‘शंघाई सेक्युरिटीज न्युज’ लगायतका स्थानीय सञ्चारमाध्यमहरूले जुलाई ७ मा उनको मृत्युको खबर सार्वजनिक गरेका हुन् ।

बिरामी भएकाले उनको मृत्यु भएको बताइएको छ । सामाजिक सञ्जालमा फैलिएका केही सन्देशहरूका अनुसार उनी क्यान्सरबाट पीडित थिए। सन् १९७१ सेप्टेम्बरमा जन्मिएका गाओ चीन प्यासिफिक इन्स्योरेन्स ग्रुपमा स्वतन्त्र सञ्चालक समितिका सदस्य समेत थिए ।

कुनै समय चीनका नियामक र शीर्ष अधिकारीहरूलाई सल्लाह दिने गाओले सन् २०२४ को अन्त्यतिर चीनको आधिकारिक आर्थिक वृद्धिदरको तथ्याङ्कमाथि सार्वजनिक रूपमा प्रश्न उठाएर अन्तर्राष्ट्रिय चर्चा कमाएका थिए ।

वासिङ्टनमा आयोजित एक कार्यक्रममा बोल्दै उनले चीनको आर्थिक वृद्धिदर आधिकारिक रूपमा दाबी गरिएको ५ प्रतिशतको आसपास नभई वास्तवमा करिब २ प्रतिशतको औसत गतिमा मात्र भइरहेको दाबी गरेका थिए। यस टिप्पणीपछि चीन सरकारले उनीमाथि अनुसन्धान सुरु गरी विभागीय कारबाही समेत गरेको थियो।