काठमाडौं- जापानमा बस्ने तिब्बतीहरूले टोकियोस्थित चिनियाँ दूतावासअगाडि प्रदर्शन गरेका छन् । चीनले जुलाई १ देखि नयाँ ‘जातीय एकता कानुन’ लागू गरेको विरोधमा प्रदर्शन गरिएको हो । प्रदर्शनकारीले तिब्बती भाषा र संस्कृतिको रक्षाको माग गरेका छन् ।

प्रदर्शनमा अमेरिकामा आत्मदाह गरेका एक तिब्बती अभियानकर्ताको पनि स्मरण गरिएको थियो । उनले चीनको यही नयाँ कानुनको विरोधमा आफ्नो शरीरमा आगो लगाएका थिए । प्रदर्शनमा सहभागीहरूले उनको आत्माको शान्तिको कामना गर्दै प्रार्थना गरेका थिए । उनीहरुले चीन सरकारको नीतिको कडा विरोध गरे ।

चीनको नयाँ कानुनले चिनियाँ राष्ट्रको एकतामा आँच पुर्‍याउने कार्यलाई दण्डित गर्ने व्यवस्था गरेको छ । यसले तिब्बत जस्ता क्षेत्रहरूमा चिनियाँ भाषाको प्रयोग र प्रचारलाई अनिवार्य बनाएको छ । आलोचकहरूका अनुसार यसले तिब्बती संस्कृतिलाई समाप्त पार्नेछ ।