काठमाडौं– राज्यको निकायबाट झमेला बेहोरेकै कारण मृत्युको बाटो रोजेकी एक नागरिकको घटनाप्रति तत्कालीन प्रधानमन्त्री सुशीला कार्कीले माफी मागेकी थिइन् । गत मङ्सिरमा बर्दियाको बढैयाताल–४ की एक युवतीले नागरिकता लिन सङ्घर्ष गर्दागर्दै आफ्नो ज्यान आफैँ लिएकी थिइन् । 

उनको मृत्यु भएको एक महिना पछि ६१ वर्षीय बुवाको समेत निधन भएको थियो । सो घटनाबारे उल्लेख गर्दै प्रधानन्यायाधीश समेत रहेकी कार्कीले सामाजिक सञ्जालमार्फत माफी मागेकी थिइन् । त्यो बेला उनले लेखेकी थिइन्– ‘न्यायिक –प्रशासनिक झमेलाका कारण यो अवस्था निम्तिएको हो भने देशको प्रधानमन्त्रीको रूपमा म माफी चाहन्छु ।’

तर, बिहीबार मुगुका गणेश नेपालीले राज्य संयन्त्रबाट दुःख पाएर ज्यान लिएको खुलिसक्दा पनि प्रधानमन्त्री वालेन्द्र शाहले यस घटनाबारे एक शब्द पनि सार्वजनिक गरेका छैनन् ।

त्रिपुरेश्वरस्थित राहदानी विभाग अगाडि आफ्नै शरीरमा आगो लगाएका मुगु सोरु गाउँपालिका–१ का २५ वर्षीय नेपालीको उपचारका क्रममा निधन भएको छ।

वीर अस्पताल स्रोतका अनुसार भेन्टिलेटरमा उपचाररत नेपालीको शुक्रबार बिहान ११ः२० बजे मृत्यु भएको हो।आत्मदाह प्रयासपछि गम्भीर अवस्थामा रहेका नेपालीको अनुहार, टाउको, घाँटी र छातीमा गहिरो जलन भएको थियो।