काठमाडौं– महानायक राजेश हमालले कुनै पनि शक्तिको प्रभावका कारण सार्वभौमिकता र स्वतन्त्र निर्णय क्षमतालाई ओझेलमा पार्न दिन नहुने बताएका छन् । सामाजिक सञ्जालमा पोस्ट गर्दै महानायक हमालले शक्तिशाली राष्ट्रहरूको रणनीतिक प्रतिस्पर्धाले प्रभावित आजको विश्वमा नेपाल सधैँ आफ्नो राष्ट्रिय हितबाट निर्देशित हुनुपर्नेमा जोड दिएका छन् ।

नेपालले सबैसँग मित्रताको हात बढाउनुपर्ने तर कुनै पनि बाह्य शक्तिको प्रभावले मुलुकको सार्वभौमिकता र स्वतन्त्र निर्णय क्षमतालाई ओझेलमा पार्न दिन नहुने उनको तर्क छ । राष्ट्रको वास्तविक शक्ति राजनीतिक संस्थाहरूलाई सबल बनाउन, विधिको शासनलाई सुदृढ गर्न र दलगत राजनीतिभन्दा माथि नेपाललाई राख्न सक्नुमा निहित हुने उनले बताएका छन् ।

उनले कुनै पनि सरकारको सुरुवाती सय दिनको मूल्याङ्कन केवल उसका प्रतिबद्धता वा घोषणाहरूका आधारमा मात्र नभई उसले लिएको दिशा र जनतासामु प्रस्तुत गरेका परिणामका आधारमा गरिनुपर्ने टिप्पणी गरेका छन् । सामाजिक सञ्जाल फेसबुकमा एक पोस्ट गर्दै महानायक हमालले वर्तमान समयमा नेपाली जनताले भाषणभन्दा बढी जवाफदेहिता, रोजगारी, न्याय र सुशासनको ठोस अपेक्षा गरेको बताएका छन् ।

मुलुकमा हालै भएका युवा आन्दोलन र राजनीतिक उतारचढावप्रति लक्षित गर्दै महानायक हमालले युवा आन्दोलनले जनताभित्र रहेको वास्तविक असन्तुष्टि र परिवर्तनको आकाङ्क्षालाई उजागर गरेको टिप्पणी गरेका छन् । उनले सम्पूर्ण देशवासीलाई विवेकशील र एकताबद्ध रहन अपिल गर्दै राजनीतिक विचारधाराभन्दा नेपालप्रतिको प्रेमलाई माथि राखेर अघि बढ्न आग्रह गरेका छन् ।