काठमाडौं– विपक्षी दलले सीमा विवादसम्बन्धी विषयमा प्रधानमन्त्रीको जवाफ माग गर्दै प्रतिनिधिसभामा निरन्तर विरोध जनाएका छन् ।  

बिहीबार प्रतिनिधिसभा बैठक सुरु हुने बित्तिकै विपक्षी दलका सांसदहरूले उठेर विरोध जनाएका थिए । त्यसपछि सभामुख डोल प्रसाद अर्यालले विपक्षी दलका तर्फबाट नेपाली कांग्रेसकी सांसद हरिनादेवी कामीलाई बोल्न समय दिएका थिए ।

सांसद कामीले प्रधानमन्त्री वालेन्द्र शाहले गत जेठ १७ गते प्रतिनिधिसभाको बैठकमा दिएको सीमासम्बन्धी अभिव्यक्ति प्रति आपत्ति जनाउँदै रेकर्डबाट हटाउन माग गरिन् । उनले यस विषयमा प्रधानमन्त्री सदनमा उपस्थित भएर स्पष्ट पार्नुपर्ने धारणा राखिन् ।  

त्यसपछि अन्य विपक्षी दलका सांसदहरूले पनि बोल्न समय माग गरेपछि सभामुख अर्यालले विषयवस्तु एउटै भएकाले विरोध गर्ने शैली परिवर्तन गर्न सुझाव दिए । उनले एक पार्टीबाट एक जनाले बोलेर बैठक अगाडि बढाउनका लागि सहयोग गर्न अनुरोध गरे । 

तर विपक्षी दलका सांसदहरूले आफूहरूले पनि बोल्न पाउनुपर्ने भन्दै विरोध जनाएपछि सभामुख अर्यालले सबैलाई बोल्न समय दिएका थिए । सीमा सम्बन्धी प्रधानमन्त्रीको अभिव्यक्ति सच्चाउन माग गर्दै विपक्षी दलले लामो समयदेखि सदनमा विरोध गर्दै आएको छ ।