काठमाडौं । अर्थ मन्त्रालयअन्तर्गतका भन्सार विभाग र आन्तरिक राजस्व विभागका नेतृत्व फेरिएका छन् ।

भन्सार विभागको महानिर्देशकमा सहसचिव यमलाल भुसाल नियुक्त भएका छन् । सो विभागका निमित्त महानिर्देशक भरतमणि पाण्डेयको अर्थ मन्त्रालयबाहिर सरुवा भएको छ ।

त्यस्तै, विभागकै उपमहानिर्देशकमा प्रेमप्रसाद आचार्यलाई नियुक्त गरिएको अर्थ मन्त्रालयले जानकारी दिएको छ ।

यता, आन्तरिक राजस्व विभागको महानिर्देशक पनि फेरेर डा. भीष्मकुमार भुसाललाई महानिर्देशकको जिम्मेवारी दिएको छ । हालका महानिर्देशक रमेश अर्यालको अर्थ मन्त्रालय बाहिर सरुवा भएको मन्त्रालयले जानकारी दिएको छ ।

मन्त्रालयका अनुसार नयाँ जिम्मेवारी पाएका तीनैजना सहसचिव हालैको मन्त्रिपरिषद् बैठकबाट अर्थमा सरुवा भएर आएका हुन् ।