काठमाडौं– साहित्यकार अच्युतप्रसाद चालिसेद्वारा लिखित दोस्रो साहित्यिक कृति ‘अम्मल’ कथासङ्ग्रह औपचारिक रूपमा सार्वजनिक गरिएको छ ।

आइतबार साहित्य सदन नेपाल, रामहिटीको आयोजनामा आयोजित एक विशेष समारोहकाबीच यो कृतिको लोकार्पण गरिएको हो । 

कृतिका बारेमा बोल्दै समीक्षकहरूले पुस्तकमा पौराणिक आख्यानदेखि आधुनिक समाजका जटिल मनोविज्ञानसम्मका कथाहरूलाई अत्यन्तै कुशलतापूर्वक बुनिएको बताएका छन् । 

कार्यक्रममा बोल्दै कथाकार अच्युतप्रसाद चालिसेले यस जीवन यात्राका अनेकौँ उकाली–ओराली र सङ्घर्षका अनुभवहरूलाई समेटेर यो कथासङ्ग्रह तयार पारेको बताए । 

उनले ’अम्मल’ कथासङ्ग्रहले पाठकलाई गम्भीर जीवन दर्शन र सामाजिक यथार्थ बोध गराउने विश्वास गरिएको बताए ।

विमोचन कार्यक्रममा वरिष्ठ साहित्यकारहरू, समालोचक तथा पाठकहरूको उपस्थिति रहेको थियो ।