काठमाडौँ – सन् २०२६ विश्वकप फुटबल अन्तर्गत सोमबार अमेरिका र बेल्जियमबीच सिएटलमा हुने बहुप्रतीक्षित अन्तिम १६ को खेलको टिकट मूल्यमा उल्लेख्य गिरावट आएको छ । खेलको समय नजिकिँदै गर्दा टिकटको न्युनतम मूल्यमा ३० प्रतिशतभन्दा बढीको गिरावट आएको हो । शनिबार साँझदेखि भने मूल्यमा सामान्य सुधार देखिएको छ ।

टिकट ट्र्याकिङ सेवा ‘टिकटडाटा डटकम’ का अनुसार, जुन १ मा यस खेलको न्युनतम टिकट मूल्य झन्डै चार हजार अमेरिकी डलर पुगेको थाहा भएको थियो । अमेरिकाले बोस्निया एन्ड हेर्जेगोभिनालाई २–० ले हराउँदै अन्तिम १६ मा स्थान पक्का गरेपछि मंगलबार १५ सय ४९ डलरमा ओर्लिएको टिकट मूल्य पुनः बढेर २ हजार ८ सय ३६ डलर पुगेको थियो ।

त्यसपछिका दिनमा भने मूल्य लगातार ओरालो लाग्यो । शनिबार दिउँसोसम्म टिकटको न्युनतम मूल्य ३२ प्रतिशतले घटेर १,४२३ डलरमा झरेको थियो, जुन शनिबार बेलुका ६ बजे सम्ममा सामान्य बढेर १,६३५ डलर कायम भएको छ ।

यो उतारचढावका बाबजुद अमेरिका र बेल्जियमबीचको खेल अन्तिम १६ का आठ खेलमध्ये दोस्रो महँगो टिकट मूल्य भएको खेल बनेको छ । मेक्सिको सिटीमा आइतबार हुने मेक्सिको र इङ्गल्यान्डबीचको खेलको न्युनतम टिकट मूल्य सबैभन्दा बढी ३,५७४ डलर रहेको छ ।

बेल्जियमको बेसक्याम्प सिएटल स्टेडियमभन्दा मात्र १६ किलोमिटर टाढा ‘साउन्डर्स एफसी पर्फर्मेन्स सेन्टर’ मा रहेकाले पनि यो खेलमा दर्शकको चासो बढी हुने अनुमान गरिएको थियो । बेल्जियमले यसअघि सिएटलमा समूह चरणमा इजिप्टसँग १–१ को बराबरी खेलेको थियो भने अन्तिम ३२ को खेलमा सेनेगलमाथि ३–२ को रोमाञ्चक पुनरागमन जित निकालेको थियो ।

यसैबीच, शनिबार भएको खेलमा मोरोक्कोसँग ३–० ले पराजित हुँदै क्यानडा विश्वकपको अन्तिम १६ बाट बाहिरिने पहिलो टोली बनेको छ ।