मोरङ- गृहमन्त्री सुधन गुरुङले सीमा सुरक्षा सुदृढ बनाउने र प्रहरीका भौतिक पूर्वाधार सुधार गर्ने काम सरकारको प्राथमिकतामा रहेको बताएका छन्।

नेपाल–भारत सीमाक्षेत्रको सुरक्षा अवस्थाबारे जानकारी लिन मोरङ पुगेका गृहमन्त्री गुरुङले विराटनगर विमानस्थलमा सञ्चारकर्मीसँग संक्षिप्त कुराकानी गर्दै देशभरका प्रहरी कार्यालयका जीर्ण भवनको पुनःनिर्माण र स्तरोन्नतिका लागि सरकारले आवश्यक तयारी गरिरहेको जानकारी दिए।

उनले विभिन्न जिल्लाका प्रहरी कार्यालयका भवन जीर्ण अवस्थामा रहेको जानकारी आफूलाई भएको उल्लेख गर्दै प्रहरी संगठनलाई प्रभावकारी बनाउन भौतिक पूर्वाधार सुधार अपरिहार्य रहेको बताए।

मन्त्री गुरुङले सीमा सुरक्षालाई थप मजबुत बनाउन सुरक्षा संयन्त्र सक्रिय रहेको पनि बताए। उनका अनुसार चोरी–तस्करी नियन्त्रण, सीमा क्षेत्रमा सुरक्षा निगरानी विस्तार तथा सुरक्षा निकायबीचको समन्वयलाई प्रभावकारी बनाउने दिशामा गृह प्रशासनले काम गरिरहेको छ।

उनले सीमा क्षेत्रमा हुने अवैध गतिविधि नियन्त्रण गर्दै शान्ति सुरक्षा सुदृढ बनाउन सरकारले आवश्यक कदम अघि बढाइरहेको समेत बताए।