काठमाडौं– राप्रपा परित्याग गरी नयाँ राजनीतिक दल गठनको तयारीमा रहेका नेता धवलशमशेर राणाले  नेपालको संविधान र गणतन्त्रविरुद्धको कार्यलाई राज्यविरुद्धको कसुरका रुपमा परिभाषित गर्ने प्रस्तावप्रति आपत्ति जनाएका छन् । 

शुक्रबार काठमाडौंमा पत्रकार सम्मेलन गर्दै राणाले अन्तर्राष्ट्रिय मापदण्ड र  संविधानको सीमा विपरीत, सरकारले गणतन्त्रकाविरुद्ध गतिविधि गरे २५ वर्षसम्म सजाय गर्ने व्यवस्था राखी मुलुकी अपराधसंहिता संशोधन गर्ने प्रस्ताव गरेको भन्दै आपत्ति जनाएका हुन् ।

सरकारले मानवअधिकार र नागरिकको स्वतन्त्रताको मौलिक हकबिरुद्ध नै कदम चाल्न खोजेकाले समयमा नै सरकारलाई सजक गराउन खोजेको उनले बताए । उनले राष्ट्रवादी र राजावादीहरूले यस्ता कानुन बन्न नदिने भन्दै आफूहरू २५ वर्ष जेल बस्न तयार रहेको स्पष्ट पारे । 

त्यस्तै राणाले नयाँ पार्टीको विधान, नाम, झण्डा सबैको टुङ्गो लागिसकेको भन्दै असारभित्रै निर्वाचन आयोगमा दर्ता गरिने र पार्टीको नाम सार्वजनिक गरिने बताए ।