काठमाडौँ – नेपाली राष्ट्रिय क्रिकेट टोलीका लेग स्पिनर सन्दीप लामिछानेले जारी फिफा विश्वकप २०२६ अन्तर्गत पोर्चुगल र क्रोएसियाबीचको खेललाई ‘अन्तिम मिनेटको ड्रामा’ भन्दै प्रशंसा गरेका छन् । अन्तिम ३२ को खेलमा पोर्चुगलले क्रोएसियालाई २–१ ले पराजित गरेपछि सन्दीपले सामाजिक सञ्जाल फेसबुकमार्फत आफ्नो धारणा सार्वजनिक गरेका हुन् ।

विश्व फुटबलका दुई लेजेन्ड क्रिस्टियानो रोनाल्डो र लुका मोड्रिचको तस्बिर सेयर गर्दै सन्दीपले दुवै टोलीको खेल भावनाको तारिफ गरेका छन् । उनले पोर्चुगलले निकै मिहिनेत गरेर जित निकालेको उल्लेख गर्दै पराजित क्रोएसियाको पनि खुलेर प्रशंसा गरेका छन् ।

“अन्तिम मिनेटको ड्रामा ! पोर्चुगलका लागि निकै मिहिनेतपूर्ण जित,” खेलको रोमान्चकताबारे सन्दीपले फेसबुकमा लेखेका छन्, “तर पूरा जस क्रोएसियालाई पनि जान्छ, किनकि उनीहरूले आफूसँग भएको सबै शक्ति लगाएर खेले र अन्तिम सिट्टी बज्दासम्म पोर्चुगललाई दबाबमा राखे । कस्तो शानदार खेल !”

इन्जुरी समयमा गोन्सालो रामोसले गोल गरेपछि पोर्चुगलले खेल २–१ ले आफ्नो पक्षमा पारेको थियो ।